الحرة حدث
بقلم:الحجيه حسنة...
اجِتني جارتي أم ستار تشكي من رجلها وتكَول الزاير كل ما يعاركني يكّلي والله هسه مال اخابر ابو درع يجِي يشيلجِ بالصندوكَ والله كتنلي ببو درع هذا؟
سالت عمتي وهي مرة جِبيرة وماتشوف كّالت يمه ابو درع هذا جِان سركال يم الشيوخ
واجِانا جارنا ابو كاظم هم سالته شو تيها عليه
كَلتلها اشكَالج ؟
كَالت حجية شو ما ادري شلون حجي يكول هذا حارس يم هارون الرشيد هو الي كَتل البرامكة
انوب طلعلي البرامكة هو اني ابو درع ما اعرفه انوب البرامكة؟
واجاني بن حماي يشئد عل مولدة اجِت لو لا همالتين سالته
يكول هذا حداد مال شبابيجِ ببو سيفين؟
زين اريد بس اعرف هذا ابو درع شني شغله اذا هو حارس يم هارون الرشيد شلون يحطني بالصندوكَ وذا جِان يشتغل يم السركال مال الشيوخ شعدا وياي واذا مثل مايكّول ابن حماي يسوي شبابيجِ بعد هم ما صير.
كَلتها زايرة سالفتجِ ويه ابو درع سالفة فريضة ال بديرة
كَالت حجية انوب انتي حيريني وحيرتي زماني انوب شنو هذا الفريضة
الفريضة مال ال بدير يا زايرة يكَولون
جِان رجال من اهل الله لكَه امرآيه بالشارع بالديوانيّة وهو كلشي مايعرف
وما شايف امرايه بحياته من ايام ثورة الزعيم باوع بيه ظهرت صورته...فظن ان هذه صورة اخيه المات قبل سنين ظل يبجِي واخذها اللبيت وصار كلّما يباوع بيها يشوف صورته
يظل يبجي ويظنّها صورة اخوه المرحوم!!!
شكّت زوجته بالامر وغافلته وهو نايم
لترى ماهي قصّة الصورة نظرت فيها (وهي هم ما شايفه مرآيه طوال عمرها
منذ انقلاب البكر) فظهرت صورتها وراحت الامّها العجوز وهي تبجِي وتولول
لان رجلها راح يتزوّج عليها وانه يخفي صورتها جوا المخدّة!!!
طالبتها امّها بالدليل الجازم فاطلعت الصورة(المرآية) فنظرت فيها الام(وهي ايضا لم
تر مرآيه في حياتها منذ دخول الانكليز الى عفك) فظهرت صورة الام العجوز
(فضحكت وقالت لابنتها (ولج اشبيج اتسودنتي هاي عجوز بكد حبّوبته مامعقولة
لم تقتنع ابنتها فاتفقتا ان تذهبا للسيد وهو سيحل الموضوع ..دخلتا على
السيد وهو جالس بعمامته السوداء ولحيته وسبحته ومسحة الوقاروشلون سيد مثل سادة هل وكت فشرحت
له الام مشكلة ابنتها وطلبت منه ان يجد لهما الحل لأن بنتي عدهه كومة
زعاطيط) فطالبهما بالدليل كي يواجه به الزوج فأخرجت العجوز الصورة المرآيه)
وتناولها (الفريضة) وهو ايضا لم يعرف أو يرى المرآية منذ معركة القادسية الاولى
!!...نظر في المرآة فظهرت صورته فيها طبعا
واذا به يخرج عن وقاره
المزعوم ويغرق بضحكة مجلجلة قائلا للمرأتين المذهولتين(من الله يطيّح حظجن
ياناقصات العقل والدين ولجن هذي صورة علي ابن ابي طالب سلام الله عليه من
صخّم الله وجوهجن. ..بس تعرف تتبلن عل الرجال؟
ها زايرة هسه عرفتي ابو درع
كَامت الزايرة من مكانها وهي تكول حجية الجِدر عل النار خاف يحتركَ ونوب الزاير يجيبلي ابو درع.