جمهورية نعال السيد الاتحادية
الحرة حدث
الله يرحمه جدي صيهود چان كل مايطگه عرج لو لوّيه ايروح يم سيد حنون يتفل بوجه.. وگضه عمره وجه متروس جراثيم مال ساده واسعة الانتشار ,والمصيبه ايگول ردّت عويفيتي ويگوم يشتغل اوفر تايم بالزرع.... ومحد چان يعرف سر الآنتي بايتك الياخذه كجرعه مباشره من حلج السيد گبل بنص گصته وگصت الخلفوه مثل ( تفال ــ تركس او نعال ــ تركس ) النوع الثاني من المضادات چان ياخده لوعلى راسه لو على جعبه... ويرد الدنيه ماشايلته من الفرح.. الكارثه چان يرجع صاحي صدگ ومابيه احريشي نقلا عن حليلته طيبة الذچر گاشيه ... طلع اخرب بيتي يفهمونه اذا ماطاب يعني مايحب النبي واهل بيته وگلبه ايوهوس.. ويمكن يطلع ابن حيض لو ابن حرام
افااااااااا لا عمي اطيب واني الممنون ..لسان حال جدي كان يقول وهو يمسح كمية القاذورات المتبقيه من تفال السيد على وجهه
راحت السنين وردت السنين والناس عرفت الدکتور والمستشفه وصار تفال ـ بايتك سيد حنون ما يجيب نتيجه لان الجراثيم اطورت بمرور الوکت وبدت تتكيف ويه الآنتي بايتك مال الساده,معناته خلصت ايام التفال ولعبان النفس ودخلنه على عصر النعال الديجيتال...الي واحدهن يسوه الدوله ومابيه..اسمع يالشامت.
المشكله بعد ان انقرض جدي وخلص من التفال المبارك ,طلع جيل جديد لايكتفي بالتفال علاجا ولا بالنعال ملاذا.. بل اخذ يمصمص تايرات الجكسارة اتگول ايمصمص بخياره ... ويشمشم المقرنص مال ساحة التحرير المتشرف للتو بنعال السيد الي يسوه الدوله ومابيه..اسمع يالشامت... وينسه مايگوله الغايد من تعليمات ذروريه بخصوص التظاهرة ... ويتناطح ویطارح حتى ايحصل انفاس مباركة من وصلت قماش من فراش السيد .
يمكن هاي اول مره اشوف روحي ويه الغايد من دون شروط من حيث مامش واحد مايتمنه يخلص من صراصير السياسه والزواحف والحشرات بكل انواعه الطايره منها وام شوارب التي تعجّ وتمجّ بها الخضراء وضواحيها ...بلاكت شعب ثواره يهيمون غراما بالنعال ويتبركون بالتاير كتعويذة تطرد الارواح الشريره وقائدها يشلع ويقلع ولا تايسن بزمانه...شغله يرادله صفنه
هاذي الجموع الغفيره سعت بالاعتصامات الخروج من الازمة الخانقه التي تمر بها البلاد تحت شعار نعال السيد يسوه الدوله ومابيها...وبرعاية شركة جبنة لافشكري اللذيذه.....مع تجاهل مقصود لمشاعر الشعب الذي يتوق لمعرفة حجم النعال الذي من المؤمل ان يصفع به وجه العمليه السياسيه وجعبها كي تتعافى من العله كما كان جدي صيهود رحمه الله يتعافى بصطرت نعال لاستيك واحدة.
