اخبار العراق الان

بالفيديو ,   2016/10/28 14:19  , عدد القراءات: 7

بغداد- العراق اليوم:  ينشر "العراق اليوم" فيديو وكلمات الأنشودة الحسينية "بنات النبي" وهي من أداء الحاج باسم الكربلائي، وكلمات عبد الخالق المحنة والتي نالت اقبالا جماهيريا عارما في داخل العراق وخارجه.

 بنات النبي

قومن بنات النبي ، خيطن خيمجن عبي

هاي الزلم ما تظل ، باجر وراجن سبي

يالله أستعدن لباجر هالليلة كلش قصيرة

 باجر زلمنا تسافر كلمن يروح إلمصيره

إنسن دلال الهواشم وإنسن صفات الأميرة

كل وحده تلزم طفلها ولوذن أسيرة بأسيرة

وبسرعة كون المشي ، إحنا نسا ونختشي

لا يبقى عدجن أمل ، باجر وراجن سبي

من هسه خلنا نفكر لمن تصير المسية

ليلة تحامي رقية وآني عليه البقية

من الشمر يعتنيني لا لا تطيحن عليه

خلني وحدي إلسياطه لمن يقطع إيديه

باجر سياط الهضم ، خل تنزل إعله العظم

خلي أبشر إلكفل ، باجر وراجن سبي

ما ظل وكت يالحراير باجر تسافر زلمنا

باجر غطانا سحابة ناتج مداخن خيمنا

صيرن درع يا خواتي وآنا أشيلن علمنا

إحنا ثكاله وأرامل بالغربة من يحترمنا ؟

نصبغ وجهنا بدمه ، حتى العدو انوهمه

كلشي صفن محتمل ، باجر وراجن سبي

لا لا تلفظن أسامي خاف العدو يكتشفنا

يبقى يسب الغوالي يعرفها نقطة ضعفنا

كل غالي باجر نتركه ماكو اهم من شرفنا

واللي يطمئنا باجر كلش قريبة نجفنا

باجر حرب تستمر ، بين الخدر والشمر

واقع صبح مو مثل ، باجر وراجن سبي

شوفن وجوه الغوالي ساعة وحفظن علايم

يختلف باجر شكلهم لمن تطيح العمايم

جثة تطيح إعلى جثة تلتم جسوم الهواشم

رملة يا ليلى تحيرن منهو علي ومنهو جاسم

كل الجثث تنسحق ، تقطع وتفترق

إنسن عتاب الأهل ، باجر وراجن سبي

مهد الطفل خل نبعده شوفوله خيمة بعيدة

رملة بعد لا تهلهل شمع العرس ما نريده

لمن تشوفن كفيلي لحد تباوع لأيده

وابن امي باجر نشوفه سيف اليمزق وريده

خل ننظر إلرقبته ، وقت الظهر ذبحته

ودعنّه بس بالعجل ، باجر وراجن سبي

من هسه صيرن سبايا وآنا الحرس والكفيلة

اتعلم إعلى الحراسة ما ظل وكت هيّا ليلة

ما نشتكي من ألمنا ، من يسمع ونشتكي له ؟

أدري علينا صعوبة وقصة سفرنا طويلة

باجر زند ينبتر ، باجر ظهر ينكسر

عالشاطي يوقع جبل ، باجر وراجن سبي

لو وحدة باجر ولوها لازم تخف ابمشيها

خلها تنادي "يا زينب" اعليه تأشر بإيديها

حتى إيعرفني ويجيني بلكت بعد ما يجيها

إختك يا راعي الكفالة كلها تدور عليها

يا ويلي وكت الظهر ، يرجع لي خالي المهر

أعرف أخويه إنجتل ، باجر وراجن سبي