اخبار العراق الان

إلى من رَحَلَ بعد أن ورّطنا بالصّدق والحبّ والوعي..
ها نحن على أتمّ يُتمٍ، بين أصحاب الكذب والقلوب المليئة بالكراهية والجَهَلة.. إليه وحده سيّد الرّوح: 
..
..
البُعد حيره
القُرب حيره
الصمت حيره
الحرف حيره
إشتهيتك تذبح الحيره
إشتهيتك..
حيل ضكني الشوگ
وبس يمّك تدابيره
..
..بأول ريح كل ناسك أخذها الروج
وخانو كل حَچي الملاّح
وباعوها السفينة
وكسّروها ألواح
وغدر بينا الشريف
وخان أبو الغيره
..
..الحچي حيره..
البچي حيره..الحچي يكشّف إوجوه إجروح
الجرح تفضح تعابيره
البچي ياكل بگايا الروح
وروحي إرويحة الطيره
..إشتهيتك هسّه يمحمّد
طفل جرحي إيتمرّجح آه
طفل والطفل ما يرتد
إشتهيتك هسّه يمحمّد
لأن فرهود صارت ديرة محمّد
وبياضك راح كل وكته
وحصص كلمن أخذ حصته
ولفتنه أغراب ما بيهم جرح صدري
ولا بيهم طعم من لمسة إچفوفك
ولا مرّة لسعهم شوگ لطيوفك
لفتنه إشكول تاكل بينا مثل الدود
گصص غبره وضماير سود
ما ضاگو لهيب الرمل بالكوفة
ولا شربو لذيذ الچاي من صيهود
يا صيهود.. يا صيهود.. يا صيهود:
أحلّفك بإستكان الچاي يا صيهود
أبونا الراح يمته يعود؟
..
..أريدك هسه يمحمّد..
لغيرك ما تلوگ الروح
الجرح سچّه وإلك يمتد
أريدك ملگه للحيره
الزرع خانت نواطيره
وإحتارت نواعيره
أريدك هسّه يمحمّد
أريدك ما أريد الغير
أريدك والجرح يشهد..