يحيى هاشم فلحي
يمهاجر بلاسبب
بس حن عليَّ عودْ
روحي بجفونك مشت
والجسد ظل بس عودْ
گطِّعْ اوتار الگلب
سولك ربابة وعودْ
واعزف لحن قصتي
شوگ وجروح وألمْ
بس آنه دون الخلگ
ظلّيت اطشّر وَلِمْ
هَمْ ترجى من الشَمِسْ
والليل يِصْفَنْ وَلِمْ
دمعة وشمرها الجِفِنْ
تتلگى خَدَّكْ عودْ
،،،،،،،،،،،،،،،،،،،،،،
يالوجهك من الگمر
والگذلة شدّة وردْ
ولهان انا لشوفتك
كل ساع اروحن وردْ
شتنتظر من صفنتك
راجع قرارك وردْ
موذنبك اللي جرى
ذنبي آنه گلبي هوىْ
سار بدرب عشرتك
وبنار هجرك هِوى
مرتجي بيدك لِزَمْ
مايدري بيدك هَوى
كافي تجريح الگلب
ويكفي اللي مِنَّكْ وُرَدْ