طعم جبريل: علاء البغدادي

ويا أول إسم من ينذكر ترتيل

وحقّ كل كلمة منّك بإذني محفورة

أو وحقّ هيبة بياضك يا ملاذ النور

الوضع تاهت تفاسيره

..

..

وخانو كل حَچي الملاّح

وباعوها السفينة

وكسّروها ألواح

وغدر بينا الشريف

وخان أبو الغيره

..

..

البچي حيره..

الجرح تفضح تعابيره

البچي ياكل بگايا الروح

وروحي إرويحة الطيره

..

طفل جرحي إيتمرّجح آه

طفل والطفل ما يرتد

إشتهيتك هسّه يمحمّد

لأن فرهود صارت ديرة محمّد

وبياضك راح كل وكته

وحصص كلمن أخذ حصته

ولفتنه أغراب ما بيهم جرح صدري

ولا بيهم طعم من لمسة إچفوفك

ولا مرّة لسعهم شوگ لطيوفك

لفتنه إشكول تاكل بينا مثل الدود

گصص غبره وضماير سود

ما ضاگو لهيب الرمل بالكوفة

ولا شربو لذيذ الچاي من صيهود

يا صيهود.. يا صيهود.. يا صيهود:

أحلّفك بإستكان الچاي يا صيهود

أبونا الراح يمته يعود؟

..

..

لغيرك ما تلوگ الروح

الجرح سچّه وإلك يمتد

أريدك ملگه للحيره

الزرع خانت نواطيره

وإحتارت نواعيره

أريدك هسّه يمحمّد

أريدك ما أريد الغير

أريدك والجرح يشهد..