اخبار العراق الان

 

بقلم:الحجية حسنة...

 

سيدنا الغالي حبيت اكتبلك هاي الرسالة ولو اني اعيوني ما اشوف بيه زين والقلم بلكَوة الزمة.

 لكن الك كل شي يهون سيدنا  لنك ثاثير بن ثاير واعرف كلش زين مواقفك الوطنية .

بس هل ايام ماعرف شنو الي صار عين وصابتك خلتك  كل ساعة براي.

شنو السبب والله مادري 

اول مرة كَلت ثورة على الفساد والمفسدين ومشينا وياك.

ومرة اعتصامات وعتصمنا ومرة عل الصلاح وكَنا هاي نوب شني بس هم ركضنا وياك

ونوب بتت بالمنطقة الغبرأ وحنا بتنا بره وكَنا تكَضي وصير سوالف.

وطلعت من المنطقة وكَلت كلمن يروح البيته وطشينا ومانعرف السالفه شنو.

والله تاهت علينا جيراني الحجية ام ستار والزايرة نجية دائما يسألني شلون صارت الامور حسبالك اني بالبرمان.

بعدين سيدنا انطيت مهلة 45يوم وبعدين بطلت منها وبعدين شلع قلع وبالاخير جمدت جماعتك الي بالبرلمان وصرت ويه الروس التلاثة الاكبار.

وبعدين كَلت مظاهرة مليونية يوم الاثنين كَنا شدو روسكم يكَرعان.وتالي اتجلت ما ادري اللغت والله ما ادري شتريد سيدنا.

والله احنا نحبك ونحب ابوك وخوتك الله يرحمهم بس مو هيج سيد ادخيل بختك تعبتنا خليت بل واحدنا (يلعب طم خريزة)اثبت على راي حتى الامور تكون واضحة عدنا لان احنا مو مثل عقلك الجٍبير فهمنا على كَدنا بس ندري محد يدور نفع للعراق وترا هاي الدول الملعونة مثل قطر والسعودية هما راس البلا.وهما داعمين الارهاب وانت تدري كلش زين .

اريد اسالك بوح السيد ليش الجزيرة اطلع البيان قبل يوم وتكَول مقتدى الصدر هيجٍ راح يحجِي وهيج راح يكول وليش النايب المفرجي يكول مقتدى هيج راح يحجي.

وهذا النوب السفير السعودي ابن ال...الله يلعنك يلساني 

يكول مقتدى يمثل وحدة العراق وماكايل على اي شيعي هيج حجي .

وليش قناة العربية تطلع تقارير عليك وهي بعداوة ويه الشيعة.

لان هي سعودية ..سيدنا والله هواي عندي سولات محيرتني بس ما اريد ادوخك بيهن.

لا تنسى جماعتك كتلت الاحرار خطية اجمدهم واحد منهم رئيس لجنة الامن والدفاع ضل يبجي لان امرت بانسحابهممن الاعتصامات مال البرلمان .وانت بنفس الوقت تكول مالي علاقة بيهم ومالهم علاقة بيه بس اني متعاطف وياهم هذا اللقاء بالموبايل شايفته.

ابو هاشم اني وياك ...بس انت ويامن ؟

ويه الجبوري وربعة ويه المعتصمين بالبرلمان ويه السعودية ويه قطر لو ويه ايران.

فهمنا سيدنا خلي الناس تفتهم الي اتعطلت مصالحها اكثر ماهي متعطلة.

هم تعرف ابو هاشم السوكً اشلون واكَف وكَفة وصاصلة للظالين.

جماله الدولار صاعد صعدة واصل لخوت موزة الجو حار واكيد تدري بكل هل الوضعية.

سيدنا بروح ابوك وجدك رسول الله لا تضيع حبنا ولا حب الناس الك.

طولته عليك سيدنا لكن ما نعرف بهدنيا احد غيرك.

الله يحفظك وينصرك ويطول بعمرك.

الجية حسنة 24/4/2016